SKETCHES

ആമുഖം

യാത്രയിലലയാനും തിരക്കിലലിയാനും ഇഷ്ടമുള്ളവര്‍ക്കായി ചെറുസൂചകങ്ങള്‍ മാത്രമാണീ കുറിപ്പുകള്‍. യാത്രാവിവരണമെന്നുപേരിട്ട് അക്ഷരങ്ങളിലൊതുക്കാവുന്നതല്ല, യാത്രയുടെ സത്ത. സമയവും സഹായികളും സമ്പത്തും സജ്ജതയുമൊന്നുമല്ല; മനസ്സ്- അതാണൊരു യാത്രയ്ക്കുവേണ്ടത്. പുതിയൊരിടത്തെ കാറ്റും മഴയും മഞ്ഞും വെയിലും കൊള്ളാന്‍, രുചിയും മണവുമറിയാന്‍, രാവിരുളുന്നതും പുലരിതെളിയുന്നതും കാണാന്‍... ചരിത്രത്തിനും ഐതിഹ്യങ്ങള്‍ക്കും പുരാണങ്ങള്‍ക്കുമൊപ്പം ഒരുനിമിഷത്തെ മന:പ്രവേശം!

ശിലയിലായാലും മരത്തിലാണെങ്കിലും പുരാതനവാസ്തുശില്പകലയുടെ തനതായ ചാരുതയും അലങ്കാരക്കാഴ്ചകളും ഏറിയപങ്കും ഹൈന്ദവാരാധനാലയങ്ങളടെ കുത്തകയാണ്. ദേശക്കഥാപെരുമകളും അങ്ങനെതന്നെ. അതുകൊണ്ടാവാം ക്ഷേത്രങ്ങളുമായും ഉത്സവങ്ങളുമായും ബന്ധപ്പെട്ടാണ് മിക്കകുറിപ്പുകളും.
കാലം തങ്ങളുടെ പേരോര്‍ത്തുവയ്ക്കണമെന്ന വാശിയേതുമില്ലാതെ അനാദികാലം മുതല്‍ ഈ മണ്ണില്‍ നടന്നൊടുങ്ങിയ ഒട്ടേറെ കലാകാരന്മാരുടെ മനസ്സും പ്രയത്നവും കരവിരുതും ആരാധനാലയങ്ങളായും ചരിത്രാശ്ചര്യങ്ങളായും പ്രകൃതിയില്‍ വേരുറപ്പിച്ചുനില്പുണ്ട്-നമ്മെക്കാത്ത്, നമ്മുടെ കരുണകാത്ത്.
പിമ്പേയെത്തിയവര്‍ക്കായ്, പോയ ജനതയുടെ ഈടുവയ്പുകള്‍...!
ഒരു മദ്ധ്യതിരുവിതാംകൂറുകാരന്‍-ഓണാട്ടുകരക്കാരന്‍-ആയതുകൊണ്ട് അത്തരത്തില്‍ കാഴ്ചക്കുറിപ്പുകള്‍ വ്യത്യസ്തമാവുമെന്നു പ്രതീക്ഷിക്കുന്നു. വിയോജിപ്പുകള്‍ അറിയിക്കുമല്ലോ. വിമര്‍ശനം സ്നേഹപൂര്‍വ്വമാകട്ടെ.
യാത്രകള്‍ കാഴ്ചകളുടെ അരങ്ങുകൂടിയാണ്. ചുമ്മാതൊന്നിറങ്ങിനടക്കൂ, പുറത്തേക്കോ, പിറകിലേക്കോ.
മനസ്സിനിഷ്ടപ്പെട്ടവരോടൊപ്പമാകണം യാത്ര. അല്ലെങ്കില്‍ ഒപ്പംവരുന്നവരുടെ ഇഷ്ടങ്ങള്‍ മനസ്സിലാക്കിവേണം. കാറ്റടിച്ചാല്‍ കരണ്ടുപോകുന്നവരെയും അട്ടയെകണ്ടാല്‍ ഞെട്ടുന്നവരെയും ചെറുമഴകൊണ്ടാല്‍ മലമ്പനിപിടിക്കുന്നവരെയും അന്തിയായാല്‍ '..മ്മേക്കാണണം'ന്നു ചിണുങ്ങുന്നവരെയും 'കുങ്കുമപ്പൂവ്' കഴിഞ്ഞാലുടന്‍ തട്ടേല്‍-സോറി, ബെഡ്ഡേല്‍ കണ്ടോണമെന്ന ശാസനത്തില്‍ തുല്യംചാര്‍ത്തി അടിയറവുപറഞ്ഞ വീരഭര്‍ത്താക്കന്മാരെയും ഒഴിവാക്കാന്‍ ശ്രദ്ധിക്കണം. അവര്‍ യാത്രയുടെ രസംകളയും.

ഇനിയുള്ള യാത്രകള്‍ ഒരുമിച്ചാവാം...

Pages

SKETCHES

No comments:

Post a Comment

Mavelikara